గాయం

అలుపన్నది ఉందా..
ఎగిసే అలకు, యెదలోని లయకు
అదుపన్నది ఉందా, కలిగే కలకు కరిగే వరకు
మెలికలు తిరిగే మది నడకలకు
మరి మరి ఉరికే మది తలపులకు...
లల... లల....లలలలా..
(అలుపన్నది)

నా కోసమె చినుకై కరిగి
ఆకాశమే దిగదా ఇలకు 
నా సేవకే సిరులే చిలికి
దాసోహమే అనదా వెలుగు
ఆరారు కాలాల అందాలు
బహుమతి కావా నా ఊహలకు
కలలను తేవా నా కన్నులకు..
లల.... లలా.... లలలలా..
(అలుపన్నది)

నీ చూపులే తడిపే వరకు
ఏమైనదో నాలో వయసు
నీ ఊపిరే తగిలే వరకు
ఎటు ఉన్నదో మెరిసే సొగసు
ఏడేడు లోకాల ద్వారాలు
తలుపులు తెరిచే తరుణం కొరకు
ఎదురుగ నడిచే తొలి ఆశలకు..
లల.... లలా.... లలలలా
(అలుపన్నది )